सोलापुरात लँडिंगवेळी विमानाचे चाकफुटून निखळले:महिला वैमानिक सुरक्षित, दुपारी 2 वाजून 2 मिनिटांनी क्रॉस कंट्री उड्डाणादरम्यानची घटना

सोलापूर विमानतळावर लँडिंगदरम्यान एका प्रशिक्षणार्थी विमानाच्या पुढच्या टायरचा अचानक स्फोट होऊन चाक निखळल्यामुळे हे विमान धावपट्टीवरच अडकून पडले. सुदैवाने या घटनेत कोणतीही मोठी हानी झाली नाही. विमानातील महिला वैमानिक ज्योती सतीश तन्वर (22) या पूर्णपणे सुरक्षित आहेत. त्यांना कोणतीही दुखापत झाली नाही. विमानातून थोडे ऑइल सांडले असले तरी ती गंभीर समस्या नसल्याचे स्पष्ट करण्यात आले आहे. गुरुवारी दुपारी 2 वाजून 2 मिनिटांच्या सुमारास ही घटना घडली. हे विमान ‘क्रॉस कंट्री’ उड्डाणावर होते. त्याने सुरुवातीला कलबुर्गी येथून उड्डाण केले आणि प्रथम बारामतीला पोहोचले. त्यानंतर बारामतीहून सोलापूरला आले. सोलापूरहून विमानाला पुन्हा बारामतीला जायचे होते. मात्र, सोलापूरमध्ये लँडिंगदरम्यान विमानाच्या पुढच्या चाकाचा स्फोट होऊन चाक निखळले आणि ते धावपट्टीवरच थांबले. या विमानात पायलट ज्योती तन्वर या एकट्याच होत्या. घटनेनंतर विमानातून थोडे ऑइल सांडले,मात्र ती गंभीर समस्या नसल्याचे सोलापूर विमानतळाच्या व्यवस्थापक अंजनी शर्मा यांनी सांगितले.